Tá Pléaráca Teo., An Scéim Ealaíon Phobail lonnaithe i Ros Muc i gConamara Theas. Bunaíodh Pléaráca Teo. mar Scéim Ealaíon Phobail i 1993 faoi chlár de chuid Áisíneacht Chomhraic na Bochtaine. Ó 1997, tá sé maoinithe ag Clár Forbartha Pobail na Roinne Pobail, Tuaithe agus Gaeltachta. Cuireann an eagraíocht béim ar úsáid na
n-ealaíon i gceantar tuaithe agus is í an Ghaeilge teanga oibre an tionscnaimh, mar gurbh í an Ghaeilge teanga an phobail. Reachtáileann Pléaráca clár leathan imeachtaí ealaíona i rith na bliana sa gceantar ó Charna go Bearna.

Faoi an gClár Forbartha Pobail tá béim faoi leith dhá chur ar cheantar Ros Muc, Chamuis agus Chill Chiarán, pobail ina bhfuil saibhreas teanga, ach ina a bhfuil deacrachtaí le sarú má tá an saibhreas sin le maireachtáil. Sé bunaidhm Phléaráca ná cultúr agus saibhreas na Gaeltachta a cheiliúradh, dul i ngleic le imeallú agus mí-bhuntáiste agus meanma, féinmheas, féiniúlacht agus misneach an phobail a neartú.

Chun imeachtaí agus gníomhaíochtaí ealaíona a reachtáil, faigheann Pléaráca Teo. tacaíocht airgid ó an Roinn Gnóthaí Pobail Tuaithe & Gaeltachta, Údarás na Gaeltachta, An Chomhairle Ealaíon, Coiste Gairmoideachais Cho. na Gaillimhe, Comhairle Contae na Gaillimhe agus Foras na Gaeilge.

I 1998, bhuaigh Pléaráca Teo. an duais náisiúnta sa gcomórtas AIB Nationwide Better Ireland Awards. Ba aitheantas iontach a bhí anseo agus thug an duaischiste cúnamh maith chun imeachtaí agus seirbhísí breise a reachtáil.